சுணைக்கேடு(Creeps)’-தமிழில் ஒரு ஜேர்மானிய நாடகம்

Posted on September 15, 2012

0


கொழும்பில் இயங்கிவரும் ஜேர்மன் கலாசார அமைப்பான கோதே நிறுவனம்(Gothe Institute)அனுசரணையுடன் செயல் திறன் அரங்க இயக்கம்(Active Theatre Movement)யாழ்ப்பாணப்பல்கலைக்கழக கைலாசபதி கலையரங்கில் 26.08.2012 அன்று முதற் தடவையாக மேடையேற்றியது. இந்த நாடகத்தை ஆங்கிலம் வழியாக தமிழில் மொழிபெயர்த்தவர் கலாநிதி குழந்தை ம.சண்முகலிங்கம்.தே.தேவானந்த் இதனை நெறியாள்கை செய்திருந்தார்.


 கைலாசபதி கலையரங்கத்தின் முக்கால்பகுதி இருக்கைகள் நிறைந்த நிலையில் நாடகம் ஆரம்பமாகியது. திரை விலகியதும் எழுந்த இசையும்,மேடையின் அமைப்பும் சற்று நிமிர்ந்து உட்கார வைத்தது.சுணைக்கேடு’என்ற பதின்ம வயதினர்களுக்கான தொலைக்காட்சி நிகழ்ச்சியை தயாரிப்பதற்காக, ஸ்ரூடியோவில் உருவாக்கப்பட்ட நவீனமான, கவர்ச்சியான இருக்கைகள் கொண்ட அமைப்புடன் கூடிய மேடை. நடுவில் சுருண்டு விரியக்கூடிய வகையில் அமைக்கப்பட்டிருந்த வீடியோ திரை என வித்தியாசமான தோற்றத்தில் இருந்தது மேடை.
நாடகத்துக்கான கரு இது தான்.பெருந்தொகையான விண்ணப்பங்களில் இருந்து ஒரு தொலைக்காட்சி நிகழ்ச்சி அறிப்பாளரை தெரிவு செய்யும் இறுதித் தேர்வுக்கு அழைக்கப்ட்டிருந்த மூன்று பதின்ம வயது பெண்கள், நிகழ்ச்சித் தயாரிப்பாளரால் எவ்வாறு பரீசீலிக்கப்படுகிறார்கள் என்பதை எடுத்துக் கூறுவதே இந்த நாடகம்.
சமகால ஊடக உலகில் தொலைக்காட்சி நிகழ்ச்சிகள் வகிக்கும் பங்கு மிக ஆழமானது. இளைய சமூகத்தினரின் சிந்தனை,நடை,உடை,பாவனை,உணவு என்று அனைத்தையும் தீர்மானிக்கின்ற சக்தியாக இவை அமைவதோடு, அவர்களை வாழ்வின் யதார்த்தத்தை உணர விடாமல் ஒரு பகட்டு மாயைப்பிடியில் வைத்திருக்கின்றன. இவற்றுள் Reality Shows, Life style shows வகிக்கும் பங்கு முக்கியமானது.

 

இந்த இறுதித் தேர்வுக்கு வரும் பெட்ரா(Petra),மரேன்(Maren),லில்லி(Lily) ஆகிய மூவரும் முற்றிலும் வேறுபட்ட குணாம்சங்களைக் கொண்டவர்கள். Germany யின் பல்வேறு பகுதிகளிலிருந்தும் வேறுபட்ட சமூகப் பின்னணியில் இருந்தும் வருபவர்கள். மரேன் சூழலியல் ஈடுபாடு கொண்டவள். இலகுவில் பதற்றமடைபவள். பெட்ரா இசையில், நடனத்தில் ஈடுபாடு உள்ளவள், இயல்பானவள். முன்னைய கிழக்கு ஜேர்மனியிலிருந்து வந்தவள். லில்லி வசதியான குடும்பப் பின்னணியுள்ளவர். செல்வாக்கைப் பயனபடுத்தி வேலை பெறக்கூடியவள்.

இந்த மூவரும்; ஓடிக் கொண்டிருக்கும் வீடியோ கமராவுக்கு முன்னால் முகம் தெரியாத குரலால் பரிசோதிக்கப்படுகிறார்கள். நிகழ்ச்சித்தயாரிப்பாளரும் நெறியாளருமான ஒருவருடைய குரலே அது. அந்த மூவரது திறமைகள் வெளிப்பட பல்வேறுவிதமான சோதனைகள் வைக்கப்படுகின்றன. ஆடும்படி,பாடும்படி,நேர்காணல் செய்யும்படி ,உரையாடும்படி பலவகையான சோதனைகள் செய்யப்படுகின்றன.

ஒவ்வொரு பெண்ணும் தனக்கு மட்டுமே அறிவிப்பாளர் பதவி கிடைக்க வேண்டும் என்பதற்காக போட்டி போட்டுக் கொண்டு செயற்படுகின்றனர். ஒவ்வொருவரும் தமக்குள் சண்டையிட்டுக் கொள்கின்றனர். ஒவ்வொருவரும் தமது அந்தரங்கங்களை வெளிப்படுத்த வைக்கப்படுகின்றனர். ‘நான் கிழக்கு ஜேர்மனியில் இருந்து வந்ததால் புறக்கணிக்கப்படுவேனோ’ என்று பெட்ரா தவிக்கிறாள். ‘நான் சோர்வடைந்து போவதால்,எனது ஆதிக்க சுபாவத்தால் தெரிவு செய்யப்படாது போவேனா’ என மரேன் கவலைப்படுகிறாள். லில்லி தனது தந்தையின் செல்வாக்கைப்பிரயோகித்து வேலையைப் பெறமுடியுமா என்று யோசிக்கிறாள். இது மற்றவர்களுக்கு பொறாமையை உண்டாக்குகிறது.

இந்த மூன்று பெண்களும் ஒரு குரங்காட்டியின் கட்டளைக்கு பணிந்து செயலாற்றும் குரங்குகள் போல இந்த முகமற்ற குரலுக்கு ஏற்ப செயற்படுகிறார்கள். இவையனைத்தையும் ஓடிக்கொண்டிருக்கும் கமரா பதிவு செய்கிறது. நிகழ்ச்சித் தயாரிப்பாளரோ, ‘நான் சொல்வதை மட்டும் செய்யுங்கள் உங்களிடமிருந்து நிறைய எதிர்பார்க்கின்றோம். நீங்கள் இயல்பாக செய்யுங்கள். எங்களிடம் Magic இருக்கிறது. எதை எப்படிக்காட்ட வேண்டும் என்று எங்களுக்கு தெரியும்’ என்று கூறுகின்றார். இவர்களது அனைத்து நடவடிக்கைகளும் இவர்களுக்கே வீடியோ திரையில் உடனுக்குடன் காட்டப்படுகிறது.

இறுதியாக , தாங்கள் எவ்வாறு மனோரீதியாக,செயல்ரீதியாக சின்னாபின்னப் படுத்தப்பட்டிருக்கிறோம் என்பதை கண்டு இந்த பெண்கள் ஆத்திரமடைகின்றார்கள். ஒரு கட்டத்தில் கட்டளைகளை ஏற்க மறுத்து அவர்கள் மூவரும் கிளர்ந்தெழுகிறார்கள். ஒருமித்த குரலில் தயாரிப்பாளரை நேரடியாக வெளியில் வருமாறு கூக்கிரலிடுகின்றார்கள்; தயாரிப்பாளரோ, நெறியாளரோ வெளியே வரவுமில்லை, முகத்தைக் காட்டவும் இல்லை.

இந்த நாடகம் எமது சமூகத்துக்கு எவ்வாறு பொருத்தப்பாடுடையது? தேவை தானா? என்ற கேள்விகள் எழக்கூடும். இந்த நாடகத்தின் கரு சர்வதேசத்துக்கும் பொருந்தும் பொதுத் தன்மையுடையது.

தொலைக்காட்சி நிகழ்ச்சிகள் ஆக்கிரமிக்காத நாடே இல்லை, எல்லா நாடுகளிலும் எல்லா மொழிகளிலும் ஒரே தன்மையான Reality shows, Life style shows நடந்து கொண்டே இருக்கின்றன. இவையனைத்தும் கண்ணுக்கு தெரியாத ஒரு மறை குரலால் கருத்து ரீதியாக ஆட்டுவிக்கப்படுகிறது. கால,தேச ,வர்த்தமானங்களைக் கடந்து இந்த கண்ணுக்கு தெரியாத எதிரியின் கையில் நாம் அனைவரும் சிக்கித்தவிக்கிறோம் என்பது உண்மை. இந்த நாடகத்தைப்பார்த்துக் கொண்டிருக்கும் போது தொலைக்காட்சி நிகழ்ச்சிகள்,குறிப்பாக Reality shows, Life style shows பற்றி என்னிடமிருந்த கருத்துக்கள் தலைகீழாக மாறிப்போயின.

இன்று எமது பிரதேசம் முழுவதும் விஐய் ரி.வி, கலைஞர் ரி.வி, எஸ்.எஸ் மியூசிக், Zee தமிழ் என்று; கணக்கற்ற வகையில் தனியார் தொலைக்காட்சிகளின் நிகழ்ச்சிகள் ஒளிபரப்;படுகின்றன. எல்லாத் தொலைக்காட்சி நிகழ்ச்சிகளிலும் தற்போதைய போக்கு Reality shows, Life style shows போன்றவை தான்.தயாரிப்பாளர்களால் Magic செய்து பூர்த்தியாக்கப்பட்ட வடிவம் எங்களுக்கு ஒளிபரப்;பப்படுகிறது. இந்த magic இன் பின்புலத்தில் நடப்பது அனைத்தும் பெட்ராவுக்கும், மரேனுக்கும், லில்லிக்கும் நடப்பவைதான்.

விஐய் ரி.வி இல் Super Singer Junior நிகழ்ச்சியைப்பாருங்கள். பதின்ம வயதின் ஆரம்பத்தைக் கூட எட்டாத பாலகர்கள் ‘அற்புதமாக’ பாடவைக்கப்படுகிறார்கள். வளர்ந்தவர்களே பாட கூச்சப்படும் விரசமான, விரகதாபமுடைய பாடல்களை அதே உணர்வுடன்,அதே செய்கையுடன் பாடவைக்கப்படுகிறார்கள். அந்தச் சிறுவர்களின் குழந்தமை (Childhood) எங்கே போனது?. தாய்மாரும், பாட்டிமாரும் ரசிக்கிறார்கள், ஊக்குவிக்கிறார்கள். தோற்கும் போது எதிர்காலமே இனி இல்லை என்பது போல் கதறுகிறார்கள். குழந்தை போட்டியில் தோல்வியுற்று மேடையை விட்டு வெளியேறும் போது மிகுந்த மச்சோர்வடைகிறார்கள். அழுகிறார்கள்.

போட்டி. ஏன் எதற்கு என்று தெரியாத வயதில் உச்சக்கட்ட போட்டி நடைபெறுகிறது. இவையனைத்தையும் நேரடிக்காட்சியாக ‘Magic’ செய்து எமக்கு ஒளிபரப்புகிறார்கள். சிறுவர் துஷ்பிரயோகம் என்பது தொடுதலால் மட்டும் நிகழும் ஒன்று மட்டும்தானா? என்னைக் கேட்டால மோசமான சிறுவர் துஷ்பிரயோகம் இந்த Child Artist Reality Shows இல் தான் நிகழ்கிறது என்பேன்.

Zee தமிழ் தொலைக்காட்சியில் ‘சொல்வதெல்லாம் உண்மை’ என்ற நேரடிநிகழ்ச்சி (Reality show) ஒளிபரப்பாகிறது .நான்கு சுவர்களுக்கிடையில் கணவனும் மனைவியும் மனம் திறந்து பேசி தீர்க்க வேண்டிய பிரச்னைகள் முழு உலகுக்கும் வெளிச்சம் போட்டுக் காட்டப்படுகிறது. கணவன் மனைவி கைகலப்பு, மாமியார் மருமகள் கைலப்பு, கணவன் மனைவி ஒழுக்க மீறல்கள் எல்லாம் நிஐமாக முழு உலகுக்கும் காட்டப்படுகிறது. அந்தரங்க வாழ்வு என்ற ஒன்று இல்லாதவாறு சகலருமே சுரணையற்றவர்கள் ஆக்கப்படுகிறோம். மீடியாக்காரருக்கு தேவை பரபரப்பும் ஆரவாரமுமே. பரபரப்புக்கும் ஆரவாரத்துக்குமாய் எல்லோரும் விலை போகிறோம்.

பல்வேறு விடயங்கள் ‘சுணைக்கேடு’ என்ற நாடகத்தில் என்னைக்கவர்ந்தன. மேடை அமைப்பும், இசையும் மிகச்சிறப்பானதாக இருந்தன.வீடியோக் காட்சியுடன் இணைந்த புதிய வடிவம் பார்வையாளரை கவரக்கூடிய விதத்தில் அமைந்திருந்தது.

திரைவிலகியதும் தெரிந்த ஸ்ரூடியோ மேடை பாதிக்கதையை சொல்லி விடுகிறது. Life style shows க்கு ஏற்ற வகையில் நிகழ்கால போக்குக்கு (trendy)) ஏற்ற வகையில் காட்சியும் இசையும் ஒத்துப்போயின.

இந்த நாடகத்தில் முக்கியமாக குறிப்பிட வேண்டியது பெண்களின் நடிப்பு. இந்த நாடகத்தில் மரேனாக மரீன் தர்மிலா nஐயரட்ணமும், பெட்ராவாக அனோஐh பாரதிநாதனும், லில்லியாக துவாரகி நாகேஸ்வரனும் நடித்திருந்தனர். மூன்று இளம் பெண்களும் பாத்திரத்தை உள்வாங்கி மிகச்சிறப்பாக நடித்திருந்தனர். அதிலும் குறிப்பாக பெட்ராவாக நடித்த பெண்ணின் நடிப்பு மிகச்சிறப்பாக இருந்தது. நடனம் இயல்பாக வருகிறது. யாழ்ப்பாணம் ஒரு பெரு நகரமல்ல.

ஆனால் யாழ்ப்பாணத்துக்கிராமங்களிலிருந்து வரும் இப்பிள்ளைகள்.ஒரு பெரு நகர கலாச்சார பின்னணியை உள்வாங்கி நடிப்பதென்பது சாதாரண விடயமல்ல. நாடகப்பயிற்சியும் நாடகம் பற்றிய முற்கற்பிதங்களும் இல்லாமல் போனது தான் இவர்கள் இயல்பாக மேடைக்கூச்சமின்றி நடிப்பதற்கான காரணமோ தெரியவில்லை.

புறக்குரல்கள் மிகத் தெளிவாகவும் இயல்பாகவும் இருந்தன.உண்மையில் புறக்குரல் தான் இந்த நாடகத்தின் மையப்புள்ளி.
இது ஒரு தழுவல் நாடகமல்ல. மொழிபெயர்ப்பு நாடகம். சிறப்பான மொழிபெயர்ப்பு. ஒரு ஜேர்மன் சூழலை மொழியெர்ப்பு உருவாக்கியுள்ளது என்றே கூறலாம். கிழக்கு மேற்காக இருந்த ஜேர்மனி ஒன்றானாலும் கூட மனதளவில் கிழக்கு மேற்குப் பிரிவு இன்று வரை நிலவுவதை மொழிபெயர்ப்பும் மூலமும் நன்றாக வெளிக்கொணர்ந்துள்ளது.

இந்த நாடகத்தில் இறுதிவரை புறக்குரலுக்குரிய நிகழ்ச்சித் தயாரிப்பாளர் மேடையில் தோன்றவேயில்லை. எந்த தீர்வும் வைக்கப்படவில்லை அதுவே அதன் சிறப்பு. யாரென்று பெயர் குறிப்பிட முடியாத ஒன்று முழு உலகையும் கட்டிப் போட்டுள்ளது ஆடவைக்கிறது. உலகமயமாதல், தகவல் தொழில்நுட்ப வளர்ச்சி Corporates, Media sensation, உலகப் பொருளாதாரம், உலகச்சந்தை, நுகர்வோர் கலாச்சாரம் என்று பல உள்மடிப்பக்களும் விரிந்து செல்கிறன.

LuZ Hubner உடைய நாடக ஆளுமை இந்த நாடகமூடாக புலப்படுகிறது.
சில நாடகங்கள் அரங்கிற்கு உள்ளே இருந்து ரசித்துவிட்டு வெளியே வந்து விடுகிறோம். சில நாடகங்கள் அரங்கிற்கு வெளியேயும் எம்மை துரத்திக் கொண்டு வந்து சிந்தனையை கிளறி கொண்டு இருக்கும். ‘சுணைக்கேடு’ இந்த வகையைச்சார்ந்தது.


இ.கிருஷ்ணகுமார்,ஓய்வு பெற்ற சிரேஷ்ட உதவிப் பதிவாளர்,யாழ்ப்பாணப் பல்கலைக்கழகம்

http://www.newjaffna.com/fullview.php?id=MjAwMTg=

Advertisements